એકરારનામું

નદીનું મૂળ અને ઋષિનું કૂળ

પૂછાય નહીં.

ડાહ્યા  માણસોએ કવિને પણ

ઋષિ કહ્યો છે.

હુંય કવિ.

પણ મને ખબર છે-

મારી કવિતા વિશે

કોઈ કશું નહીં કહે.

પરંતુ મારાં કૂળ, ગોત્ર, જાતિ વિશે

બધું જ કહેશે.

કદાચ કોઈ પી.એચ.ડી.પણ થઇ જાય.

જ્યાં માણસ નહીં જાતિ જન્મે છે એ ભૂમિમાં

કવિ હોવાની મારી ધારણા

જીવન-મરણ વચ્ચે ઝોલાં ખાઈ રહી છે.; ત્યારે –

કશું હા-ના થાય

એ પહેલાં –

હું પરસોત્તમ બાબા

આથી જાહેર કરું છું કે –

હું ધર્મે હિંદુ ને

જાતનો વણકર છું.

ઉપર્યુક્ત હકીકતો

મારી જાણ

અને માન્યતા મુજબ

સંપૂર્ણપણે સાચી છે.

-સાંભળો છો દોસ્તો?