કવિતા

કવિતા કંઈ કરી શકતી નથી દોસ્ત!

કવિતાએ કંઈ કરવાનું નથી .

હા, એ કદાચ

શીખવાડી શકે તને

લડતાંલડતાં જીવવાનું,

જીવતાંજીવતાં લડવાનું

હક્ક માટે મારવાનું.

કવિતા ચેપ લગાડી શકે પ્રતિબદ્ધતાનો,

કવિતા લેપ લગાડી શકે

તારા યુગ-જૂના જખમોને.

બહારની દુનિયામાં

તને એક ડગલું

ચલાવી નહીં શકે કવિતા !

હા ,તને ખેપ કરાવી શકે

તારી અંદરની દુનિયામાં.

કદાચ...

તું પ્રગટી જાય...

ને પછી

ભીતર-બહાર અજવાળાં..

બાકી

કવિતા કંઈ કરી શકતી નથી દોસ્ત!

કવિતાએ કંઈ કરવાનું નથી.

જે કરવાનું છે

તારે કરવાનું છે .

કવિતાને પ્રતીક્ષા છે-

તારા જેવા જણની

કેમકે

કવિતા તારા માટે જીવી રહી છે.

કવિતા તારા વગર મરી રહી છે.